| 本來哩排都無乜上飛卜同腥架, 今日真係頂唔順要上黎寫野, 剛剛完結左一年幾度的腳踝受傷, 接住落黎係一年幾十度的失眠問題......... 一個月最少兩三日, 但今個星期我已經失眠左三四日...... 我覺得我都係無得醫架喇, 咁樣失眠法, 命都短幾年啦, 哩個失眠問題, 我諗我六七歲就有, 果時就因為玩得太癲睏唔著 (好正常), 小學就開始會因為第二日去旅行睏唔著 (少少唔正常), 中學果時就好似少d, 但去到會考就仆哂街, 第一年會考, 毫無壓力, 書又唔溫日日打機, 好似無失眠過, 第二年會考, 一考第一科, 好似係中文, 十二點睏, 五點半先睏著, 唔記得左會考幾點開考, 總之就開考前半個鐘先醒, 飛的出去第一城, armarm仆到上去考場坐低就考作文, 最後, 中文就咁U左..........我仲記得係作記敘文, 過多兩年, AL, 亦一樣, 又係第一科考試前一晚睏唔著, 第二次AL, 好似醒左少少, 無失眠失咁耐, 但第一科都係有睏唔著一個鐘咁上下, (其實考試前睏唔著都好正常) 但宜家人大左, 就越黎越唔正常, 宜家成日都因為知道第二日要早起身,覺得睏教時間唔夠五六個鐘, 我就會因為咁而睏唔著, 變左睏得兩三個鐘, 哩兩日仲仆街, 因為尋日睏唔著, 就會今晚成日諗住自己要快D睏得著, 最後又越諗越睏唔著, 仲要一日覆一日, 所以我今個星期先會有三四日睏唔著, 綿羊都數埋啦, 我仲可以點.........宜家唯有再上去床度碌過, 睇下六點睏唔睏得著啦 |
